2013 .... ارقدي في سلام

سنه بتروح و سنه بتيجي وادينا عايشين .. ارقدي في سلاااام 2013 و اهلا اهلا 2014 .
خدي خدي يا ست 2013 انتي رايحه فين تعالي نتحاسب يا حلوة فالبداية كدا انتي كنتي سنه زيك زي اللي قبلك و زيك زي اللي بعدك غالبا.

 علي المستوي السياسي و البلد مننكرش انها كانت سنه حلوة فاننا خلصنا من الاخوان و حكمهم الفاشل و قرفهم بس ثانيه كدا دا احنا خلصنا 2011 من مبارك و حكم الفلول الفاسد وقلنا هتبقي سنه حلوة بردو وادينا بقالنا 3 سنين حالنا بيزيد سوء كل يوم من سيئ لاسوء !!! البلد حالها متغيرش ولسه في فساد وظلم وعنف و رشاوي و ناس بتموت و ناس بتتسجن و ناس ضميرها بيموت وقلبها بيموت ولسه في كرهه .. شكلك يا بلد انتي المنحوسة مش هنظلم السنه .

وعلي المستوي الشخصي كانت برده سنه عادية الحمد لله عدت و انا لسه عايشة الله اعلم السنه الجاية هكون عند ربنا ولا لسه هنا عمتا يعني في حاجات ابتديت سنه 2013 بيها و انتهت بيها بردو زي مثلا كرهي للاخوان كان موجود فبداية السنه و علي اخر السنه لسه بكرههم بردو :D  ابتديت السنه فبيت اهلي و لسه عادي بردو فبيت اهلي و شكلي لسه مطولة معاهم :D   ابتديت السنه وانا فالشغلانه دي فنفس الشركة و هتنتهي بردو زي مانا :(  .
لكن الواحد مينكرش انه اتغيير فيه حاجات بردو من اول السنه  لاخر السنه يعني بقي عندي خبرة كويسة فمجال شغلي الحمد لله و كمان ابتديت السنه وانا مش طايقه ناس معايا فالشغل و علي اخر السنه اهو بقينا صحاب قريبين اوي كمان علي نقيد بقي السنه ابتدت وانا بحب واحد وقررت اعيش معاه باقي عمري وعلي اخر السنه بقيت بكرهه و مش طايقه اسمع سيرته و بدعي عليه فكل سجده : D و علاقتي باهلي الحمد لله بقت افضل  وابتديت كتابه التدوينات السنه دي بردو :)

فالنهاية مقدرش اقول ان سنه 2013 هي السنه الواو اللي مش هقدر انساها عشان محصلش فيها الحاجه اللي مينفعش تتنسي و فنفس الوقت مش هي السنه الكبيسة لان محصلش فيها الحاجه اللي تخليني العن فيها .. هي كانت سنه عادية زيها زي سنين قبلها وممكن سنين بعدها بردو بس اتمني الوحش اللي حصل فيها ميتكررش و الحلو اللي حصل فيها يحصلي احلي منو السنه دي.

اقذر انواع الرجال

اقذر انواع الرجال من يظن نفسه رجلا بتغذيته علي ضعف من حوله وخاصة ان كانت امرأة . هناك انواع من الرجال يعتبرون ان جرح المرأة يعطيهم قوة. لا اتكلم هنا عن حب ما بين شاب وشابه فقط ولكن بين زوج و زوجته عن الابن وامه . لكن اريد ان اسأل هولاء هل بذلك تظن نفس رجل؟ هل بذلك تظن انك قوي؟

الاجابة هي انك لست الا ***(تم حذف الشتيمة بس اكيد كلكوا عارفينها ) انت رجل ناقص رجولة !!

عندما خلق الله سبحانه وتعالي ادم -عليه السلام- اوجد له امرأة من ضلعه لتأنسه واعلم ان حواء خرجت من ضلع ادم وليس من قدمه حتى لا يداس عليها  كما أنها لم تخرج من رأسه حتى يظن بأنه أعلى منها منزلة ولا ليتعالى عليها وإنما خرجت من جنبه حتى تكون مساوية له كما أنها خرجت من تحت ذراعه حتى يدافع عنها ويحميها وتكون قريبة من قلبه ليحبها و ليس ليأتي رجل ناقص مثلك يهنيها. كيف تجرأ ايها الكائن الناقص علي اهانه وكسر المرأة التي عززها الله في قرأنه الكريم و انزل سورة النساء !!

اضحك كثيرا حين اري اسباب معامله  ذلك النوع من الرجال المرأة بقسوه ... اليكم بعض الاسباب التاليه :

-    انها افضل منه علميا او فكريا او مستوي اجتماعي اومادي ولذلك يري قوته في كسرها من خلال قلبها لانها تحبه (وذي ما بيقولوا الحب اعمي).

-     انها تعطيه كل ما ييحتاج من حب و حنان وعطف و احترام فيقوم باذللها لانه بعلم بانها تحبه لا تستطيع البعد عنها مهما فعل بها.

-      انها قررت التضحية بكل من وقف ضددها لاجله  اوانها يتيمة ولذلك يعاملها بقسوة لانه يعلم انه ليس لها ضهر تتسند عليه و تلجأ له.

-       انه وجد من هي افضل منها بالرغم من انه كان يتمنها في البداية بكل حواسه  وهذا ما نسميه (عينه فارغة).

واسباب اخري مضحكة وغبية و جاحدة و مليئة بالغل و التخلف الثقافي والاجتماعي رأيتها. 

نصيحة الي كل امرأة وفتاه اذا اردت ان تعيشي ملكة مع الرجل لا تذقينه ريحقك كاملا حتي لا يلقي بكي بعد ان اشبع كل رغباته  منك لا تعاملينه كملك لانه سيحولك الي عبده لا تعطيه مفتاحك من خلال نقاط ضعفك وبالاخص ان كان هو نقطة ضعفك.

اعلم ان هذا الكلام سهل في كتابته وقوله  وصعب في تنفيذه لكن قــــــــاومـــــي  واعلمي ان الله خلقك انسانه مثلك مثله وفي معظم الاحيان تكوني انتي الافضل.

وانت ايها الرجل احذر ان تكون سببا في دموع المرأة  لأن الله يحصي دمعتها...

ثورة ضدد المصريين

من المألوف في تاريخ النهضات أن اليقظة العقلية تسبق دائما النشاط السياسي والاجتماعي. - محمد الغزالي

المقولة دي كفيلة تبين ليه احنا بقالنا 3 سنين فنفس دايرة الفساد والظلم والقمع والجهل و من المتوقع هنفضل كدا كتير ودا لان كلنا عايزين نصحا من النوم نلاقي بلدنا بقت احسن و فمكان اعلي و مفيش فساد ولا ظلم ولا قهر وفي حريات لكن محدش بيعمل حاجه عشان نوصل لدا كلنا زي ما احنا كل واحد فينا شايف نفسوا اللي صح و مش عايز يغير من نفسوا , كل واحد بيقول يلا نفسي او انا وجماعتي او انا و حزبي محدش فكر يعترف بغلطوا و يصلحوا او علي الاقل يحاول لكن لا الغلطان بيكابر ويتمادي فغلطوه.

مينفعش نقول بكرة  هيجي رئيس كويس والبلد هتتعدل  ما هو سيادتكم الرئيس مش بيدير البلد وحده في تحته ناس والناس دول تحتهم ناس و كلنا فالاخر نفس الناس لو انا وانت وهو وهي مش هنتغير هنلاقي منين الناس الكويسة اللي هتحكمنا بقي ! هنجيبهم من المريخ مثلا!! اكيد مش هنلاقي اي تغيير لا فينا ولا اللي حولينا وطبيعي البلد هتفضل محلك سر.

اليابان معملتش ثورة علي النظام بالعكس دي كانت بلد مدمرة بالكامل ومهمشة بسبب الحرب العالمية التانية واهلها عانوا المرض والجوع لكن اليابان عملت ثورة فالفكر والصناعه .الحرب قدرت تدمر البلد لكن مقدرتش تدمر عقول اليابنين.
الناس دي ازاي بقت كدا مهارة وذكاء خبرة و تقنية عالية انتم متخيلين مدي عبقرية اليابنين وانك لما بتشوف حاجة مكتوب عليها صنع في اليابان بتاخدها وانت مغمض!! هل احنا الشعب المصريين مش قادرين نبقي زي اليابانين ؟؟ انا متأكده ان الاجابه لا احنا نقدر ونقدر اوي كمان بس مع تعديل فالفكر و الطموح فاسلوب الحياة و عادتنا وتقاليدنا اللي معظمها ملهاش معني وهنلاقي نفسنا وصلنا.

احنا اسقطنا ثلاث انظمة ولكن لم نسقط سياسية الجهل والقمع والظلم والفساد وتذكروا دائما قول العظيم مانديلا :العبيد فقط يطلبون الحرية الاحرار يصنعونها.
غيروا من نفسكوا من تفكيركوا وحياتكوا السلبيه عشان تعيشوا بحرية و في عدل وسلام ورخاء وتنمية متستنوش فلان ولا علان يدهلكوا. بلاش تفكير في مصالح شخصيه بصوا لمصلحة البلد ومصلحة المصريين ككل كفاية فساد ورشاوي ووسايط وسرقة ونصب كفاية انا الصح ومحدش غيري اللي صح كفاية تعصب وكره كفاية كسل وتقاعص وعدم تحمل المسؤلية.

مصر مش هتكون احسن الا بينا و احنا مش هنكون احسن الا لو مصر بقت احسن. كلنا فنفس المركب  ينقب سوا يا نضيع سوا.

بنفس الغباء.. الداخلية بلطجية

رجع الباشا بنفس الوش واللي اتغير بس الصورة دا مش مجرد هتاف بنقوله لما رجعنا ننزل من تاني الميدان بعد ما رجع بطش الداخليه .. دا حقيقة نسي الباشا لما كان بيمشي بعين مكسورة من بعد 25 يناير 2011 نسي الباشا اللي ثوار عملوه فيه وكسروه وربوه من تاني خلوه قلع البدلة الميري و قعد فبيتهم من الجبن اللي حس بيه ورجع الضابط ابو دبورة ونسر وكاب يمارس بطشوه وظلموه علي الثوار من خلال قانون التظاهر قانونهم الاهبل اللي عايزين يحكمونا ويكتفونا بيه بغبائهم مش عارفين ان عمرنا ما التزمنا بيه ولا هنلتزم بيه . 

بكل اسف بقالنا تلات سنين عايشين فدايرة  بنلف حولين نفسنا مش عارفين نطلع منها ...في 2011 قامت ثورة ينايرقام بيها الثوار وكان ضددها الفلول و الاخوان و ركبها الاخوان بعد كدا والمجلس العسكري. . وفي 2012 قامت احداث كتير محمد محمود ومجلس الوزراء وماسبيرو.. الخ ودول قام بيهم الثوار وكان ضددهم الاخوان والفلول و جينا في 2013 قامت ثورة يونيو وقام بيها الثوار وكان معاهم اطراف كتيرة من طوائف الشعب وركبها الفلول بكل اسف و الاخوان ضددها ومسمينها انقلاب باطل. لكن علي مدار التلات سنين في حاجه واحده متغيرتش وهي بلطجة الداخليه بصراحه هما الوحدين اللي مغيروش مبادئهم من ظلم وقهر وبلطجة.

من اول يوم 30  يونيو وبعد سقوط نظام الاخوان كان لازم معاها يمشي محمد ابراهيم وزير الداخلية اللي قتل ناس خلال حكم الاخوان لكنه استمر كوزير ورجع دلوقتي بالقبض علي الثوار ورجع من تاني بلطجه الداخليه علي الثوار الاحرار من بعد ما عاشوا دور الجبان بعد ثورة يناير ودور الملاك البرئ بعد ثورة يونيو.

المشكله بينا وبين الداخلية ان احنا خيالنا واسع بالحريه وهما خيالهم مريض بالهمجيه ولا احنا هنتنازل عن الحرية ولا هما عارفين يبطلوا همجية .

 

ملاك في زمن الوحوش

الطفله البريئة زينة ذات الخمس سنوات كل ما يخطر ببالها اللعب مع الاصدقاء ومشاهده الكارتون وكل ما تريده شراء الشيبسي والشيكولاته . وفي يوم مشئوم لهذا الملاك اختطفها كائنات غير ادميه ولا يعرفون معني للرجولة ولا الانسانية واغتصبوها جنسيا و عندما صرخت من الخوف علي شرفها التي لم تفهم معناه حتي في هذا السن وبدون شفقه او رحمه القوا بها من الدور العاشر حتي تفارق هذه الطفلة الحياة المتوحشة التي لم تعيش لتتمتع بها حتي.

في الجنه يا زينه .. انتي في جنه الاخرة ونحن في جهنم الدنيا.

مجتمع متخلف يتعامل مع الانثي علي انها جسد حتي لو كانت طفله ذات خمس سنوات لم تبلغ ولم يظهر عليها اي علامات انوثه ولكن لمجرد وحشية التعامل مع جسد المرأة اختطفوها.. نفسي اعـــــــرف فكروا ازااي فدا وليــــــه !!!!!

ان ابشع الجرائم علي وجه الارض هو الاغتصاب لانه ليس اغتصاب جسدي فقط ولكنه اتنهاك لحرية المرأة وكرامتها وشرفها وعرضها لذلك لابد ان من تتطبق ابشع واقوي عقوبه علي جريمة الاغتصاب.

الاسوء ان في هذا المجتمع المعاق ينظر للفتاه التي تم اغتصبها انها وصمه عار و نقف ضددها و احيانا ايضا نكون في صف المغتصب وحتي لو كان بشكل غير مباشر حين نقول "نبلغ ايه لازم نداري علي الفضحيه"!!! 

هل تعلمون ما هي الفضيحة الحقيقة ؟؟ هي انتم ايها المجتمع المعاق فكريا واجتماعيا الذي يتستر علي مجرم قذر انتهك عرضكم بحاجه الحفاظ علي العرض والسمعه. كيف يخطر ببالكم هذا التفكير الجاهل !!

اطالب بمعاقبة عديمي الانسانية الذين اغتصبوا زينه وقتلوها ولن اتنازل عن اعدامهم في ميدان عام وبابشع الطرق التي عرفها التاريخ للاعدام ليكونوا عبرة لكل من تقوده شهواته لفعل هذه الجريمة البشعه.

اشباه الرجال

يوجد في هذا الكون الكثير من الذكور ولكن ايا منهم يستحق لقب رجل!! لا اعتقد ان هناك اكثر من 3% او 4% يسحقون هذه اللقب.

و علي النقيض نجد ما اسميه بـ "اشباه الرجال " واعتذر عن ذكري لكلمة رجال في هذا التوصيف قد كثروا في مجتمعنا ..
حيث ان من يقوم بضرب امه او زوجته لانهم فقط اضعف منه جسديا ليس رجلا. من يخون زوجته او حبيبته التي وثقت به واعطته حبا وحنانا ليس رجلا. من يعد زوجته او حبيبته وعد ولا يلتزم به ليس رجل .
من يستغل ضعف صديقته و يستغلها باقذر   الطرق جنسيا او عاطفيا او ماديا ليس رجلا. من ينظر الي المرأة انها عبده(الست امينه) و يقوم باداء دور (سي السيد) ليس رجلا. من ينظر الي جسد المرأة وليس روحها و شخصيتها ليس رجل.
من يتكلم بوقاحه و عجرفه مع زوجته او حبيبته لمجرد انه يعلم انها تحبه وستتحمله ليس رجلا.من يتحرش بالفتيات ليس رجلا.من يغتصب الفتيات عاطفيا او جسديا ليس رجلا.

كثيرا منكم ايها الذكور مكتوب في شهاده ميلاده ذكر ولكن انظر الي نفسك في المرأة وحاسب نفسك جيدا هل انت رجلا و تستحق هذا اللقب ام انك من هذا النوع الذين يطلق عليهم "اشباه الرجال".   

التمثيل.. هواية دائمه

عند قراءة هذا العنوان يبدو للقراء و للوهله الاولي انني ساتحدث عن التمثيل خلف شاشات التلفاز او السينما. لكنني ساتكلم اليوم عن التمثيل الحقيقي, التمثيل الذي نقوم به انا وانت وهي و هو في حياتنا اليومية في معظم افعالنا.
نري الزوج يمثل علي زوجته بانها اجمل ما حدث له و هو في الحقيقة يتمني زوجه افضل, ,والزوجه تمثل السعاده والامان علي زوجها وفي قلبها حزن لانه ليس الرجل الذي تمنته وليست الحياه التي تريدها, يمثل الابناء علي اهلهم بالفرحه والسعاده حتي لا يجرحوا مشاعرهم بالرغم من انهم في قراراه نفسهم يتمنون اهل افضل.
يمثل الحبيب علي حبيبته حتي يحقق رغباته العاطفيه والجنسيه , تمثل الحبيبه علي حبيبها لانها تخاف ان تقع في فخ يسمي (جواز الصالونات) , يمثل الاصدقاء علي بعضهم البعض لمصالح شخصية ما , تمثل الصديقه علي صديقتها ولكنها فالحقيقة تشعر بالغيرة منها.
كل منا يقوم بالتمثيل علي الاخر لسبب ما. ولكن هل نقوم بالتمثيل علي انفسنا ؟ الاجابه هي نعم انه اسوء نوع من التمثيل من الممكن ان يحدث.
نحن نقوم بالتمثيل علي نفسنا بان نكون باخلاق وعادات و اساليب مختلفه عن التي بداخلنا حتي نرضي شخص ما او حتي لا نكون منبوذين او حتي يتقبلنا الجميع. و الاسوء حين نقوم بالتمثيل اننا شخص اخر حتي نرضي انفسنا لاننا غير راضيين عن انفسنا ولا نحب ما نحن عليه . واسوء الاسوء ان نمثل اننا سعداء وفي داخلنا حزن يقتلنا.
ليس من الخطأ ان تكون انسان غير كامل فاننا بشر و دائما بنا عيوب ونخطئ حتي نتعلم, و ليس من السئ ان نكون غير راضيين عن نفسنا ونحاول ان نكون افضل وذلك بان نفعل الافضل وليس بالتمثيل علي انفسنا.
 

انا امرأة.. انا انسانة و لست عبده

فالبدايه اتمني منكم مشاهده هذا الفيديو انه اقوي واحلي واقنع فيديو يمثل المرأه  ما بين الوقع المرير و المرأة كما يجب ان تكون:

 http://www.youtube.com/watch?feature=trueview-instream&v=pmo8SsVEDoo

المرأة ليس دورها ان تكون تحت طوع اهلها و بعد ذلك تتحول الي عبده لدا زوجها و اولادها. ليس اهم ما يدور في بال المرأة المكياج و الملابس فقط . المرأة ليست العار الذي يطارد الاب والاهل والزوج لمجرد ان تقع في خطأ  فهل انتم ملائكه ايها الرجال ولا تخطئون؟؟   

هل تعلم من هي المرأة الحق؟

انها الام وربه المنزل التي تحمل هم زوجها و اولدها وتعمل بكل جهد ليكونوا من افضل لافضل حيث انها ترهق نفسها في تربيتهم و في نظافتهم و مأكلهم ومشربهم ولكن ديكتاتوريه الاب و في اغلب الاحيان ديكتاتوريه الابناء تتحول الي خادمه مقتصر دورها علي الغسيل و الطبخ و النظافه و التربيه و الاسوء انه كما يقال بالبلدي"مش بيطمر فيهم حاجه".

انها الفتاة التي تحاول جاهده ان توازن بين الاهتمام مبظهرها وفي نفس الوقت  تنمية عقلها و القراءة و التعرف علي معلومات و ثقافات مختلفه و الاهتمام بالدراسة ولكن في المقابل تواجه انتقاد من المجتمع علي انها اما الفتاة "التافهه" التي تهتم فقط بالمظهر الخارجي و اما تتهم انها الفتاه المعقده. فهل انت كامل ايها الرجل؟ فغالبا ما نري ان الرجل المثقف "مبهدل فنفسوا" ويكون الدفاع انه ليس لديه وقت للاهتمام بتلك الاشياء التافهه التي تسمي المظهر و العكس يحدث بالنسبه للرجل "الشيك" غالبا ما يكون تافها وغير مسئول . فلماذا تحاسبون المرأة اذا و انتم ايها الرجال ليس لديكم القدره علي الموازنة بين المظهر و المضمون.

  المرأة ليست تلك العار الذي يطارد الاهل و الزوج اذا اخطاءت فالمرأة انسان خلقه الله مثلك ايها الرجل لتخطأ وتتعلم و تخطأ وتتعلم ليس لتعيش كما يقال علي صراط مستقيم . فلما يوجهه لها اللوم اذا طلقت او خلعت زوجها او احبت شخص او اختارت صديقه غير مناسبه او فشل ابنها او بنتها فدراستهم او حياتهم.

او اقذر لوم يوجهه الي المرأة   اذا تعرضت للتحرش او الاغتصاب فيقال عنها "هي اللي لبسه ضيق  واغرتهم, هي  ايه اللي مروحها متأخر لوحدها , هي ايه اللي مخرجها فالزحمه" !!!!!!

ايها الرجل المريض .. ايها المجتمع المعاق .. ايتها المرأء الصامته اعلموا جيدا ان المرأة هي اساس بناء المجتمع فمنها و علي قوتها تبني المجتمعات الحره والقوية فاعطونا حريتنا و اعلموا جيدا ان المرأة الحره علي استعداد للموت مقابل الحفاظ علي لقب ..

"انا انسانه حرة و لست عبده "