اللهم لك الحمد كما ينبغي لجلال وجهك ولعظيم سلطانك

ياااه ع البني ادم مننا اد ايه جاحد كدااا  !!
انهارده قابلت ولد كبير في المواصلات عندوا تاخر عقلي و تخين اوي و جسمه عملاق والناس بتعامله بطريقة وحشه ومع كل دا وشه مبتسم علي طول وانا مكنتش قادرة اشيل عيني من عليه
اد ايه صعب عليا انه بيضحك و مش فارق معاه كل اللي فيه وانا من شوية مشاكل بتدمر واعيط وانهار ..
زعلت من نفسي اني بضايق واقول ليه و ازعل علي حاجه محصلتش نفسي فيها او حاجه حصلتلي مش عايزها ..
الحمد لله الحمد لله يارب .. سامحني ع كل لحظه زعلت منك او قصرت فحقك و حسبي الله ونعم الوكيل في اللي ظلمني و كسروا فرحتي و سرقوا ضحكتي حقي عند ربنا هو اللي هينتقملي..
يمكن البوست ميهمش حد اوي بس بجد احمدوا ربنا ياجماعه حوالكوا نعم كتير من عند ربنا تستاهل الحمد
#الحمد_لله #الحمد_لله #الحمد_لله
اللهم لك الحمد كما ينبغي لجلال وجهك ولعظيم سلطانك 

ومن الحب ما قتل

ومن الحب ما قتل ...
دي فعلا حكمه حقيقة لان اهتمامك و حبك و خوفك الزايد ع الحاجه ممكن يخليك تفقدها
كنت مسافره اسكندرية واخدت عصافيري معايا خفت اسيبهم واحدهم اسبوع كامل او حتي اديهم لحد ميهتمش بيهم و ماتوا مني في الطريق من الكتمه و الحر ... قتلتهم من كتر خوفي عليهم ..
قيس ع كدا كل العلاقات في حياتي من صداقه لحب لشغل  ... كل حاجه عندي بعملها بزياده ملحوظه
يعني لما بحب حد بسامحه و بنسي غلطاته و بعمله كل حاجه و اي حاجه بيتمنها فبيزهق و يبعد و يهرب من الخنقه
صاحبي مثلا من كتر خوفي عليهم بتخانق معاهم و بتخانق مع اللي بتخانق معاهم

انا فعلا عامله زي القطط اللي بتاكل ولادها من كتر حبها ليهم و خوفها عليهم
ب الحب دا مرض بالذااات لو مع حد ميستحقوش .. انا اكتر واحده بينطبق عليها المثل دا #ومن_الحب_ما_قتل

تقوقز القزقاز متقوقزا

#تقوقز_القزقاز_متقوقزا ...
عارفين الحالة دي اللي بتكون قفلت فيها من كل حاجه في الدنيا بتبقي وصلت لحاله مش فارقة زي ما يحصل يحصل زي ما تيجي تيجي
كل حاجه كنت بتحبها بقت مش فارقة معاك .
كل حاجه كنت عايزها مبقتش تجري عليها.
كل حاجه كنت بتكرهها  و تخاف منها بقيت بتحبها و بتعملها.
حالة كدا بتخليك مش عارف مين انت و لا ليه انت كدا حاله بتخلي الوحدة و السكوت و النوم و التتنيح هما اصحابك اللي الوحديين .. حالة حتي الدموع فيها مش بترضي تنزل
الحالة دي بتوصلها بعد ما بتكون شفت كتير اوي من الناس اللي حاوليك ليك يعني ناس باعتك ,ناس خذلتك او حاجه كان نفسك فيها و لقيت غيرك بيحققها او حاجات كنت بتحبها و كانت اكتر حاجه اذتك
حاله بتكره فيها نفسك مش بتعرف تشتكي و لا تتكلم ولا تبكي و لاتصرخ ... حاله بتشوف فيها كل حاجه سودا مهما كانت جميلة و منعشة ... حاله حلها الوحيد انك تموت !

المشكلة الاكبر بقي الاحساس بالذنب من ان جواك فعلا زعلان ومخنوق في الوقت اللي انت فعلا احسن من غيرك في حاجات كتير وانك لازم تحمد ربنا  بس انت مش قادر تحس دا من كتر الوجع اللي فيك و انك عارف انك تستحق اللي انت فيه دا سواء حلو اوحش و ان دا اللي ربنا كتبهولك  و انه اكيد خير بس انت مش فاهمه .