السيسي ما بين البطل والفرعون

السيسي بطل ام فرعون !؟؟

في رأي السيسي اكيـــــد بطل لانو وقف جنمب الشعب وساعدنا نخلص من حكم فاسد وجماعه ارهابيه استبادية ومستغلة الشعب الغلبان باسم الدين ورئيس اهبل مبهدل اسم مصر هنا وهناك ..

لكن بكل اسف اللي حوليه واللي كانوا كارهين حكم الاخوان بقوا يعبدوه وبغباءهم بيخلقوا من السيسي فرعون جديد.
انا بحترم السيسي جدا وشايفه بطل قومي لكن ارفض تماما انو يكون رئيس دولتنا احنا شفنا حكم مبارك والظلم اللي كنا فيه طبعا  و حكمالسادات فبعض الاحوال كان استبدادي بردو و طبعا مذكرتش ناصر لانه كان بيطبق النظام الاشتراكي اللي انا بأيده جدا ومتأكده لو كان ناصر فزمنا دا بعد الحروب والاستعمار ما خلص من البلد  كان زمنا احسن من الصين واليابان.

بالنسبه للمويدين احب اقولهم السيسي انقذنا من حكم الارهابين كتر خيره يكمل بقي دوره كوزير الدفاع اما المعارضين احب اقولكوا مش السيسي اللي اسقط نظامكوا دا شعب مصر اللي نزل بالملايين وحملة تمرد واللجنه اللي عملت خارطه الطريق.

احب اقول للمؤيدين او المعارضين للسيسي كفايه افورة وارحموا الراجل ..

فالنهاية احب اقول الجمله اللي بجد لو كلنــــــــا نفذنها صح في كل تصرفتنا وافعالنا  فشغلنا فمشيتنا في الشارع (اقصد طبعا المحافظه علي نظافه الشارع وعدم التحرش)  و فتربيتنا لاولدنا  الخ الخ...
 اكيـــــد مصر هتكون احسن واعلي وام الدنيا بجد "مــــــصــــــر فــــــــوق الجمـــــــــــــيـــع"

ليــــــــــــه مينفعش !!

اول مدونة اكتبها قررت اكتب عن قضيتي الاولي والاهم وهي "حـــــــــرية المرأة في مجتمعنـــــــا"

اكتر حاجه بتضايقني وتنكد عليا لما اقرر اعمل حاجه نفسي فيها ويمنعوني بحجه مينفعش .. و شفت دا فصحابي وبنات كتيـــر بجد اعرفهم من قريب او بعيد , محتاجه رد علي الاسئله دي:
- ليه مينفعش البنت تخرج مع صحابها كل يوم براحتها لكن الولد ممكن يخرج كل يوم وطـــول اليوم!
- ليه مينفعش البنت تنزل الاعتصامات والمظاهرات وبيتقال عليها مش مؤدبة لكن الولد لو عمل كده يبقي شاب ثوري وراجل مفيش منو اتنين!
- ليه مينفعش البنت  تركب عجلة او موتسكل  لكن الولد يتقال عليه زكي اتصرف بدل زحمه وقرف العربيات صرف نفسو!

- ليه مينفعش البنت تسافر تشتغل بره البلد لكن الولد يتقال عليه راجل مكافح وشقيان علي لقمه عيشوا!

- ليه مينفعش البنت يكون عندها صحاب ولاد و لو صاحبت يتقال عليها قليلة الادب لكن الولد لو صحاب بنات بعدد شعر راسوا يبقي مقطع السمكه ويتفشخر بدا!
- ليه مينفعش البنت تشرب سجاير ولو عملت كدا تبقي مش متربيه لكن الولد لما بيشرب يتقال عليه كبر و بقي راجل !
- ليه مينفعش البنت تحط صورها ع النت براحتها لكن الولد ممكن يتصور عريان عادي وينزلها ع النت!
- ليه مينفعش البنت تقول انــــــــا حـــــــــــرة لكن الولد اهلوا وكل اللي حوليه يقولوا هو حر !!!!!

الرد الوحيد اللي عندي ان ليه مينفعش كــــل دا  بسبب مجتمع متخلف عايش علي عادات وتقاليد جاهلية و رسم حياتو عليها ..
ياما بنات احسن بكتيييير من ولاد بس عشان الجهل والتخلف اللي فمجتمعنا انتهت حياتها اما بالجواز او الكبت او الصمــــــت

 الصورة دي معبرة جــدا عن حال البنت فمجتمعنا اللي حوليها بيخرسوها وعشان هيا خايفه من كلامهم بردو بتخرس وانا كنت كدا ...
بس خــــــلاص من انهارده 31 اكتوبر 2013 هتكلم ومحدش هيسكتني هكتب اي حاجه وكل حاجه فمدونات يومية بدل ما بقعد اكلم نفسي يمكن تويتر خالني انطلق شوية لكن هنا هكتب بحريه اكبر واكتر وهكــــــــــون حـــــرة :)