وداعا 2014 ....

ومنين ابتدي الحكاية.....
سنه 2014 بجد سنه غريبة و مريبة و سعيدة و حزينة
فيها حصلي احداث كتيير يمكن مكنتش فيوم اتخيل هتحصلي
 خسرت ناس و كسبت ناس و حبيت ناس و كرهت ناس, عملت حاجات نفسي فيها و حاجات متخيلتش هعملها فيوم من الايام
اشتغلت 3 شغلانات كل واحده غير التانية (خدمه عملاء - تأمين - عقارات)

السنه ابتدت بيوم مميز مع صحابي ليله رأس السنه وبجد انبسطت اوووي فيه و بعديها حصلت حاجات كرهت الشغل بسببها و قررت اسيبه و اغير فكرة الشغل لسيلز اوت دور و روحت GIG  ...

ياااااااااه ذكريات GIG  كتير من ناس عرفتها و بهدلة فالشوارع و مواقف حصلت و مشاكل و حوارات و لحظات حلوة و حاجات ابتدت و انتهت و حاجات ابتدت وان شاء الله مش هتنتهي.
فالشركة دي فهمت و عرفت و شفت حاجات كتير جديدة عليا و علي شخصيتي و مع كل السنين اللي عشتها بس 4 شهور اللي عشتهم في GIG  يساوي عمري كله من اللي شفته في حياتي واعتقد مش هشوف اكتر من اللي شفته دا.

و يعدها اتنقلت للعقارات مع وجع قلب ووجع داغ طلعت بيها من GIG  بس اهو بتأقلم و ان شاء الله الدنيا تكمل و تبقي تمام.

فالسنه دي اقرب ناس ليا اتجوزت و خلفت و اتخطبت و في اللي فسخت و ناس كانوا بعاد عني و رجعنا قربنا و ناس كنا قريبين و بعدنا ..
السنه دي شفت ناس علي حقيقتها منهم اللي طلع زباله و منهم اللي طلع بنأدم نضيف.

السنه دي ليا فيها ذكريات كتير مع صحابي من عيد ميلادي لخروجات و اعياد ميلاد و حفلات و لمتنا يااااه بجد كانت لحظات حلووووة و فكرها زي ما هي و حاله انتعاااش بتجيلي كل ما اتفرج ع الصور.

بالنسبه للحاجات اللي كان نفسي احققها فمتحققش منها كتير واكتر حاجة وجعاني اني كان نفسي اطلع عمرة السنه دي  بس ربنا مش
كاتبهالي.

جوايا كلام كتير عنك يا 2014 ذكريات حلوة و مرة وعن حب و كره  عن تغيير حصل في حياتي و في شخصيتي كنت فعلا بتمناه في مدونتي 2013 ارقدي في سلام السنه اللي فاتت.

2015 اتمني تكوني سعيدة و احقق كل اللي بتمناه بجد و اهم حاجة متبعديش عني الناس اللي بحبها ....

ليــــتـــــك ...

ليتك بين احضاااني ..

ليتك بين احضاني لامضي ايام وليالي ابكي ثم افرح ثم انام ثم انسي احزاني

ليتك بين احضاني اتنفس عطرك واتجلي في احزاني بين يديك و اضلاع صدرك ثم انسي احزاني.

ليتك بين احضاني ليل نهار بعيدا عن الحزن ... بعيدا عن كل ما يلهيني عنك .

ليتك تحبني و تتمناني كما اتمناك كل ليله .

ليتك بين احضاني يا اعز احبابي.

#احبك

#تخاريف_اكتئاب

عن قتل القطط والكلاب في الرحاب #مذبحة_الرحاب

هو ازاااااااي حد عنده قلب او ضمير او بنأدم اصلا و يحط سم للكلاب و القطط في الشوارع !!!
منتهي القسوة ومنتهي التخلف و بسم قوي زي سم #سم_الاستركنين
عملتلك ايه القطه ولا الكلب في الشارع عشان تحطلها سم و يفضل الحيوان يتألم ساعه قبل ما يموت

ياخي  الرسول جعل الرحمة بالحيوان بابًا من أبواب الأجر ودخول الجنَّة و القسوة معها سببًا لدخول النّار !!

وافتكر يا اقذر مخلوقات الارض  الحديث النبوي
 «عذبت امرأة في هرَّةٍ سجنتها حتى ماتت، فدخلت فيها النّار، لا هي أطعمتها ولا سقتها إذ حبستها، ولا هي تركتها تأكل من خشاش الأرض»

و كمان بقي ايه زنب عامل النظافة اللي يجي يلم القرف دا من الشوارع  يشم ولا يلمس كميه السم دا ولا الناس اللي بتفرز الزباله ولا الاقسي من كدا الغلابه اللي بياكله من الزباله

بجد اللي بيعمل كدا انت اللي حيوان و تستحق الاعدام بنفس السم دا.

وبما ان تنص المادة 357 من قانون العقوبات المصري علي انه يعاقب بالحبس مدة لا تزيد على ستة أشهر أو بغرامة لا تتجاوز مائتي جنية كل من قتل عمدا بدون مقتضى أو سم حيوانا من الحيوانات المستأنسة... أو أضر به ضررا كبيرا .
اتمني الحكومه تحمي الحيوانات بما انها مش قادرة تحبي البشر.