الثلاثاء، 26 ديسمبر 2017

25/6/2016

انهارده اول يوم اروح للدكتور النفساني
دكتور محمد حسام في مستشفي الطب النفسي
كان بقالي فتره بدور علي دكتور ارحله يمكن هو دا يكون الحل بس كنت خايفة او مكنتش عايزة علشان الفلوس او مش عارفه علشان ايه؟؟
بس بعد امبارح قررت ان لازم اروح وبالذات لما صحيت الصبح وكنت عايزة اهرب من البيت او اسافر ياما كنت عايزة افضل نايمه في البلكونه
كنت عايزة الفت نظرهم ليا حسوا بيا انا بجد بتوجع او كالعادة عايزة شفقه منهم
بس ملقتش ولا هلاقي .. ماما وانا نازله علشان خبطت البتاعه بتاعه الكهرباء وانا مش شايفه قامت شتماني  هي شايفني عامله ازاي و عيني وارمه اد كدا بس مفرقش و نزلت كالعاده وانا بعيط .. مش عارفه انا ليه بالضعف دا و بالعياط دا عيني بتحرقني و بتوجعني
لما رحت المستشفي كنت خايفة و قلبي بيدق و البنات اللي هناك دمهم واقف و رخما و حسيت اني داخله كنيسه مش مستشفي مش عارفه ليه مرتحتش
كنت رقم 3 و لما دخل رقم 1 قلت انا اصلي الظهر خرجت لقيت رقم 2 جوا و لما خرج دخل رقم 4 راجل عجوز و كبير
استفزني اوووي الموقف بقيت مش عارفه اعديه ولا اتكلم
فقلت ساكته شويه و قمت رحت للريسبشن قالتلي لا دا بيسال ع حاجه وخارج و لما تيجي زميلتها بردوا هتسالها و لما زميلتها جت نفضولي ودا استفزني اكتر قمتلهم تاني حورت في الكلام كدا بس عديتها
المفروض ياخدوا بالهم مين اللي شغال في مكان زي دا اصلا الواحد جاي فيه اللي مكفيه و حالته منيلة مش ناقصه تصرفات تانيه تتفقعه و كان ممكن اوي ياستاذنوني كان هيبقي عادي
انا مكنتش عارف ابدا منين مع الدكتور حاسه اني عايزة افضل احكي احكي بس مفيش حاجه مرتبه
هو بدأ يسالني و زي ما يكون عارف اللي فيا
انتي دي طبيبعتك ولا لا انتي متغيره ولا .. علاقتك ايه مع اهلك كل الناس سبوني و بقيت انطواءية و كارهه الناس و الدنيا ميول انتحاريه بس مقتلوش عليها
بدعي ع الناس .. سالني بقي اكتر سوال في الجون انتي بتحسي بتانيب ضمير؟؟؟ اااااه اوووي و ع طول لدرجه افقدتني ثقتي و قوتي لان ع كل اللي حواليا مطلعني غلطانه ع طول مهما حضل سكت او اتكلمت بس هما صح وانا فغلط ولا انا اسلوبي و قله ثقتي بنفسي و ضعفي بتخليهم يركبوني و يبلفوني
انا تعبت و ضعفت و كرهت الدنيا حتي الشغل لما رحت م طايقه اقعد اشتغل و قعدت اكت مذكراتي زي ما الدكتور قالي و بفكر ازاي اقلهم اني بروح لدكتور و اقلهم اصلا ولا بلاش
عيني بتحرقني و مصدعه و تعبانه و مليش نفس اشتغل يارب الدوا دا فعلا يرفع من مزاجي و ابطل اكتئب كدا و ابقي نكدية لاني مبقتش عارفه اضحك ولا انبسط زي زمان
بس الدوا مش هيحل مشاكل لانه مش سحر .. حلها من عندك يااارب
رد فعلهم لما قلتلهم اني رحت لدكتور نفساني و قالي اني عندي اضطربات نفسيه واكتءاب كان غريب مش فاهمه اضايقوا ولا عادي ولا موضوع مش فارق معايا لا وايه كمان ماما بتقولي متقوليش لحد ولا حتي احمد !! قصدها ايه وليه بجد ؟!

كان اصحاب !!

ازيكوا ..
انا بس حابه اقلكوا ان الرساله دي علشان الايام المفترجه اللي احنا فيها و دخلتنا ع يوم عرفه.  انا كمان حابه اعرفكوا اني حاولت اكلمكوا بدل المره 3 مرات مره ع دخله رمضان و زي ما يكون ربنا مش راضي اني اكلمكوا و بالرغم من اني عملالكوا كلكوا بلوك من كل حته الا ان يشاء ربنا اني اشوف صوره ليكوا مع بعض و كلمكوا مع بعض و كان مكنش في حد وسطكوا و لا ان الحد دا هو اللي اصلا مجمعكوا من الشرق و الغرب و طبعا اتقفلت منكوا زياده و مكلمتكمش.
و المره التانيه كانت في رمضان و فجأة كدا حاجه قالتلي قومي كلميهم و كان احمد بيكلم انجي ساعتها و حاولت اخد منه التلفون بس هو افتكر اني هتخانق معاه و مرديش يدهولي و جاتلي حاله عصبيه و فضلت اصوت واعيط و معرفش كان فيا ايه و مهدتش الا تاني يوم لما رحت لدكتور و كتبلي مهدئات ما علينا ..المره التالته بقي و الاخيره العيد الصغير و يشاء ربنا بردوا اشوف من اكونت حد تاني اد ايه انتوا مبسوطين و مش فارق معاكوا العيش و الملح لا و كمان بتقولوا لبعض نفس الكلام اللي كنتوا بتقلوهلي و دا اكدلي اني صح وان الطيور مبقتش شبه بعضها علشان نكمل مع بعض.
ورساله انهارده مش علشان اصلحكوا لان خلاص الحبال كلها اتقطعت لكن عايزه احاسب نفسي علشان ربنا يسامحني و قررت اكتب كل اللي حصل بينا علشان اعرف مين غلط و مين ظلم و مين اتظلم و هكون صريحه كفايه و ميهمنيش تكدبوني او تشفوني الشيخه يارا و لا الهري اللي بتقوله دا بس ربنا شاهد و عالم باللي في النفوس و القلوب.
مبدايا كدا  احب اقول ان ولاء ملهاش ذنب و اني اخدتها معاكوا في السكه فياريت متزعليش يا ولاء و مبروك ع خطوبه.
وبعد كدا خلينا نبدأ بصحاب العمر اللي راحوا واحده واحده
#نورا انتي بقي طلعتي اكبر مقلب عشتوا انتي اخترعتي مشكلة من لا مشكلة .. انا لما دخلتي كلمتيني ع هند لا كان قصدي حاجه ولا كانت طريقة كلامي غريبه ولا الهري دا و لو كان من الاولي انك تزعلي من طريقة كلامي كان يبقي ساعه ما زعقت فيكي يوم فيلم انابيل و احنا في الشارع لكن انتي ساعتها عديتها علشان مكنش ليكي بديل لكن دلوقتي انا دخلتك الشله و بقي ليكي بديل ويارا مبقاش ليها لزمه و كان لازم اعرف انك هتعملي كدا معايا زي ما كنتي بتعملي مع احمد لما تلاقي بديل ترميه و اول ما يروح البديل ترجعي. ولما دخلتي كملتيني يومها بقصيدة طويلة مردتش علشان كان قبلها بربع ساعه احمد توفيق مكلمني و قالي انا هخلي نورا تكلمك وانا قلتله لا متخلهاش تكلمني و انا مش عايزها تكلمني علشان انت قلتلها لان انا عايزها تكلمني علشان هي اللي عايزه و لو كلمتني يا احمد علشان انتي اللي قلتلها  انا مش هرد عليها و احمد عند اساليه.
بس هو الواحد لازم ياخد ع قفاه مره و اتنين علشان يتعلم وانا متعلمتش لما خنتيني لما كنا في البنك ورحتي قلتي لمحمد يارا ريحه فين و ان كنتي نسيتي فانا منستش و مش هنكر اني كنت قليله الزوق يوم الخطوبة معاكي انتي وولاء بس انا فعلا منكتش طيقاكوا و بكل اسف اللي مبعرفش امثل اني طايقة حد وانا مش طايقها.
عمتا انا مسمحاكي علشان زي ما عملتي حاجات وحشة فانا مش ناسية الحاجات الحلوة بردوا اللي عملتهالي بس انتي لقيتي بديل فاستغنيتي و انا كمان انا استغنيت .

#هند لما كلمتك لما اتخنقت انا و انجي علشن اشتكيلك مردتيش ع التلفون و اكلمك واتس مش بتردي وانا شايفاكي اون لاين قدامي و اول حاجه جت في دماغي ساعتها انك زي المره اللي قبلها وقفتي مع انجي ضددي و انك بتكلميها لان انتوا الاتنين كنتوا اون لاين علشان كدا بعت المسج اللي بعتها سعتها و عملتلكوا بلوك وخاصة لما دخلت قالتلي فكك مننا مش منها فكل اللي ظهر قدامي انكوا متفقين ع دا علشان هي اتكلمت بصفه الجمع و انتي مبترديش
انتي بقي لما زي كل اللي قرايبك قاله انك كنتي نايمه و اختك اللي كانت فاتحه و لو كنتي باقيه عليا فعلا كنتي بعتي ع الاقل قلتي مش انا اللي كنت فاتحه او اتخانقي معايا ع كلامي و خاصة انك اكيد عرفتي الخناقة بيني وو بينها و خاصة بعد كدا ردود فعلك زيهم ان احنا بنضحك و ربنا ما يفرقنا و كل الكلام دا اللي كنتوا بتقولوه و انا معاكوا و خاصة اننا كنا يدوبك قبلها بيومين بنتكلم ع ان ازاي انورا و ولاء مش عايزنهم معانا و ان من يوم مادخلوا و هما سببوا مشاكل و اتغيرنا وان نورا حاولت فعليا توقع بيني و بين انجي لما حصلت الخناقة قبل العمرة و كل الهري اللي انتوا و انا عرفينوا كويس و لو نسيته فانا مش ناسيه.
و بدروا انا مسمحاكي علشان زي ما عملتي حاجات وحشة فانا مش ناسية الحاجات الحلوة بردوا اللي عملتهالي بس انتي مكنتيش باقية عليا علشان كدا انا كمان مش باقيه عليكي.

#انجي انتي دخلتي يومها قلتيلي فكك مننا و اخدتي البوست عليكي بدون اي داعي و مع اني قعدت هادية و افلك بتتكلمي ع ايه في ايه بس انتي صممتي تطلعيني عن شعوري و حابه اقلك ان البوست كان ليكوا و ليهم و لكل الناس اللي حواليا سوا شغل او بيت او معارف لان دا طبع و مكنتش مشكلتي انك اخدتيه عليكي و نيجي عند الهري اللي قلتيه يومها انتي اتهمتيني ان ربنا ما يوحجني ليكي و نسيتي كل حاجه انا قدمتهالك من غير ما تتحوجي ليا و اني عمري عمري ما خليت حد منكوا يتحوج لا ليا و لا لغيري و كنت دايما ضهركوا و دا كنا بسبب اني مقلتلكيش مبروك ع العقد اللي هو اصلا انتي مقلتليش عنه حاجه مع العلم ان اي حاجه كنت ببيعها او بعملها في الشغل كنت بقلك عليها و من اول يوم لاني فاكره كويس لما جيت بعت اول يوم ليكي معانا جريت و حضنتك و قلتلك وشك حلو بس واضح انك نسيتي زي نا نسيتي حاجات تانيه كتير . وتاني حاجه كان علشان كنتي تعبانه و مكلمتكيش اه مكلمتكيش لانك مكنتيش تعبانه انتي رحتي عند الدكتور يوم الثلاثاء و جيتي جري قلتي بطوا تنزلوا صور و فيديوهات و بالرغم اني اضايقت من كلمتك ساعتها الا اني سكت و قلتي الدكتور قالي اقعدي من الشغل يومين و مع ذلك نزلتي 4 ايام الشغل بعدها لا و ايه كان منهم يوم المفروض نروح فيه الوكاله و 57357 بس جيه ميتنج ماونتن فيو  و قلتي مش معايا فلوش و مردتيش تيجي 57  و لو انا فعلا زي ما بتقولي مسالتش عنك وانا عارفه انك تعبانه فانا فاكره قبلها باسبوع كانت رجلي تعبانه وانا زعلت علشان هند مكلتنيش تتطمن عليا و انتي اللي قلتيلي معلش متزعليش و مش هنقف لبعض ع الواحده يايارا و عديها فانتي لو كنتي باقيه كنتي عديتها.
  بالرغم من كل دا فضلتي واني سيبتلك الشغل كله علشان عارفه ازاي بتكيدي و بتضايقي و بالرغم من اني هقلها تاني انا اللي جبتك الشغل زي ما جبت الشغل بردوا لنورا الا انك مهممكيش اني مشيت و قعدتي علشان تضايقني و تعاندي فيا بس العيب عندي انا اللي جبتك الشغل و شريبتهولك كدا وعرفتك كل طرق شغلي و لو انتي ناسيه او هتنكري فربنا عالم و شاهد. بس الواحد مبيتعلمش بالساهل و كان المفروض اني اعرف انك هتخوني تاني و تالت زي ما حصل ما سبعاوي و زي ما كنتي بتقلبي ع هند فانتي هتقلبي عليا بس انا مبتعلمش بالساهل.
لحد هنا كانت نهايه صداقتنا وانا مسامحكي  و انا مش الملاك ع فكره انا غلطت و عارفه  لكن كل حاجه حصلت مني ربنا و حده عالم انها رد فعل لكلامك و افعالك مش اكتر ولا اقل و حب اقلكوا اني لما عملتكلوا بلوك كان علشان  مشفش منكوا اللي يضايقني منكوا اكتر زي ما حصل قبل كدا و خرجتوا و قررتوا تضايقوني.

لكن اللي مش هعرف اسامحك عليه و في كل صلاة هفضل ادعي حسبي الله و نعم الوكيل هو اهلي اللي انتي ضرتيهم و انا كمان ضرتهم اني دخلتك بيتنا و من يوم ما دخلتيه مشفناش يوم عدل و عايزة اعرفك ان احمد حبيب بابا و ماما و بيفضلوه عني فانا و ربنا اللي عالم لا اتدخلت و لا حاولت اوقع بينك و بينهم و انهم مبقوش طايقنك ولا طايقين اهلك بسبب تصرفاتك او يمكن ربنا هو اللي ظهر دا علشان بنقظ اخويا منك .. انتي محبتيش احمد يا انجي احمد بنسابلك فرصة مش اكتر و دا يدليل انك كنتي بتقارني بينه و بين احمد حمزه و انا فاكره كويس اوووي كلمتك لما جيتي قليتي ان احمد قالك و قلتي ان كلنا بتقلك ان حمزة كمان معجب بيكي و انك خايفة تاخدي قرار و دا اللي كان قالبني عليكي بسبب اني عارفه كويس انتي ليه عاملتي احمد و حش و كنتي دايما صداه بس و انا قبل ما اسافر قلت لاحمد لو هي اخر واحده في الدنيا متتجوزهاش و دي و صيتي لو جرالي حاجه هناك بس انتي لما حمزة سافر و احمد ساب التجمع وراح مصر الجديدة لقيتي ان الفرص يتقل و رجعتي ترمي ع احمد تاني و علشان اخويا حبك راح سامحك و صدقك لما قلتيله متقولش ليارا اننا رجعنا بس ربنا شاء اني اعرف و مع ذلك فضلت بغبائي و سامحتك و لما بابا و ماما جم و قالولي ايه رايك في انجي قلتلهم صحبتي تفتكروا هقول ايه و سكت عن كل الكلام دا  كان في ايدي انهي العلاقة دي قبل ما تبدأ بس انا كنت جبانه و مكنش عندي جراءه اوجهك بالكلام دا ولا اقله لبابا و ماما و علشان كدا ربنا عاقيني دلوقتي و بدعيله يسامحني اني سكت وقت ما كان لازم اتكلم و علشان بردوا تعرفي مقلتيش لحد الكلام دا الا دلوقتي و بس ليكوا و ربنا وحده اللي عالم.
 انا مش مسمحاكي ع اللي عملتيه في اهلي و انك دخلتي وقعتي بيني و بين اخويا و بين اخويا و اهله اللي هما كانوا اصلا بيفضلوه عليا و انا مازتكيش و لا وقعت بينك و بينهم و لو مش مصدقة فربنا موجود وانا لا باقيه عليكي و لا ع حاجه بينا علشان اكدب او اتجمل انا بقول الحقيقة فياريت تبطلي تاذيني و تاذي اهلي  و امي .
و هند عندك تقولك اني بالرغم من اني كنت صايمه اليوم اللي قبل خطوبتكوا نزلت و اقعدت اشوف اجبلكوا ايه و افرحكوا ازاي و لو تفتكري الفيديهوات و الصو اللي عملته معاكوا في الخطوبة و هند عندك بردوا اساليها انا كنت ازاي ناوية اساعدكوا في الشقة كنت بفكر اعملكوا فيها ايه يكمن من قبل ما انتوا نفسكوا تفكروا هتعملوا ايه في شقتكوا بس معلش محدش بيتعلم ببلاش.

اخيرا بقي زي ما اذتوني اذتكوا و زي ما قدمتولي حلو في يوم الايام فانا قدمتلكوا حلو وربنا اللي عالم اني وفي العمره كنت بدعلكوا يمكن اكتر ما بدعي لنفسي و ربنا عالم و لو عايزين تسامحوني يبقي الحمد لله من ربنا و هو شاهد و عالم و لو شفت واحده منكوا فيوم في الشارع هروح و اسلم عليها بس احنا اللي بينا مات و عمره ما هيرجع و شكرا ليكوا علشان انتوا خلتيوني مبقاش ع حد و مثقش في حد لو انا كنت اتغيرت زي ما كلكوا قولتوا فكان واجب عليكوا كاصحاب تقفوا جنبي و تبقوا معايا ع الوحشة زي ما كنتوا معايا ع الحلوة مش بس لما وافي يسيبني تكونوا جنبي لا لان كل دا هري و بيعدي لكن التغيير الجزري اللي كان جوا كان لازم حد يقولي هفضل معاكي لكن انا مش زعلانه لان ربنا بعدكوا عني و خلاني اعدي الفتره دي لوحدي علشان محتجش لحد و لا ارتبط بحد تاني .
كل سنه وانتم طيبين و ربنا يتقبل و يغفرلنا في يوم عرفه ذنوبنا و لو مت فيوم ابقوا افتكرا الحلو و اقرولي الفاتحه.


سنه 2017

سنه 2017!!
بصوا الحمد لله السنه اجماليا حلو يعني لا قلب اتكسر و لاخسرت حد عزيز ولا فقدت حاجه مهمه .
اعتقد من اميز اللي حصل في السنه دي اني سبت ديارنا و اتحركت من المكان اللي كان بقالي فيه 3 سنين.
وكمان جبت العربيه واتعلمت السواقه واخويا اتجوز و عملت فلوس حلوة.

شكرا 2017 انك كنتي سنه الحمد لله كويسه.


الجمعة، 9 ديسمبر 2016

سنه 2016 !!

سنه 2016 من اكتر السنين الغريبه اللي مرت في حياتي .. سنه غريبه في اللي حصلي واللي اتحولت ليه واللي حصل لناس حوليا
مقارنه بالسنين اللي فاتت فهي فعليا سنه احدثت تغير كبير في حياتي

مبدأ السنه بدأت باحسن حاجه حصلتلي في عمري كله #العمره <3 p="">العمره بالنسبه لي مش مجرد حاجه اتمنيت اعملها بقالي فتره ولا كونها غيرت من طبعي و لبسي و شخصيتي للاحسن ولا كوني قربت من ربنا اكتر واكتر و حبيته اكتر ..
العمره  كانت سبب .. سبب بدور عليه علشان اتغيير لاني فعلا كنت زهقت مني و من حياتي و من اللي حواليا و من اللي بيحصلي .. العمرة كانت سبب لعدم كرهي للحياة و عدم كرهي لقدري .
حبيت نفسي من تاااني بعد ما رحت و حسيت اني نضفت من جوايااا
العمرة احسن حدث حصلي في حياتي ..

بس الطبيعي ان ربنا بيختبرنا بحاجات صعبه علشان يشوف مدي قدرة علي التجمل والصبرو من مجرد ما رجعت ما بين تريقه وانتي مش هتستمري و شيخه يارا .. الخ الخ
كان في اختبار اصعب اني ابتدت اخسر حاجات كتير منهم الجنون اللي كنت بتميز بيه و روحي الخفيفه بقي فعلا دمي تقيل و سخيفة ابتدت اخسر ناس كتير قريبين مني اوي او يمكن يكون ربنا ظهرهم علي حقيقتهم في الوقت المناسب و شغلي ابتدي لفتره يتضر فعلا بسبب اشخاص كتير و ابتدت في حاله من الاكتئاب و ليه يارب
و ابتدت كلمه كل دا حصل لما اتغيرتي و قربتي من ربنا تحوم حواليا بس انا موقفتش وكنت بقع و بقوم لوحدي محدش كان سند ليا و لا ضهر زي قبل كدا .. كنت فعلا انا وربنا وبس
كان يزقني يوقعني فحاجات صعبه و يشوف قدرتي علي تحمل وكنت قد الاختبارات و بقت كلمه الحمد لله علي لساني و في قلبي في كل وقت و في كل موقف و بجد بقيت راضيه تماما عن كل اللي بيحصل الوحش قبل الحلو #الحمد_لله

و يجي بقي جوايز نجاحي في الصبر . واذ فجأءه و بعد 3 شهور تقديم في التطوع ل 57357 يكلموني و يقوليلي اتقابلتي و ابدأ احلي رحلة في حياتي و اللي مكنتش بحس اني عايشه الاوانا بلعب مع الاطفال دول .. مهما وصفت عالم 57 محدش هيتخيل ايه اللي بحسه و بعيشه هناك .. انا فعليا مبقتش عارفه مين بيعالج مين ولا مين بيسعد مين هما ولا انا !! بيدولي قوة فوق ما حد يتخيل .. و بالرغم من وجعهم و المهم الا ان ضحكتهم و شقاوتهم مش بتفارق وششهم .
دعوة ام ليا لما اضحك ابنها او اخلي ينتها تمشي بعد ما كانت راقده ايام او اني يتقالي ان  الطفل دا ماكلش بقالوا كام يوم و جيتي انتي اكلتيه و كلمه ربنا يجازيكي خير و لا ان طفل بيستناني كل اسبوع علشان اجي اقعد معاه .. بجد 57357 حياة تحب تعيشهاااا هما اللي بيعالجوني مش انا اللي بعالجهم بحد .. ربنا يشفيكووااا يا حبايب قلبي ويعفي عنكوا .

و الجايزة التانيه كانت  #السفر و دا من اكتر الحاجات اللي اتمنتها في حياتي و رحلة دهب الغريبه العجيبه بكل ما فيها و لان ربنا بيكتب دايما الخير .. يقوم ربنا مبوظ الرحلة من عنده و يخليني اتعرف و اقرب من ناس كتيره جديدة و اعرف اني لسه ممتوش واني قارده اندمج مع الناس و اعيش واتعايش من تاني ورجعتلي ثقتي بنفسي من تاني <3 nbsp="" p="">
ورحلة ورا رحلة و خروجه ولا خروجه و تجارب كتير جديده زي التزحلق علي الرمل و حرب الالوان و طلوع جبل سانت كاترين  و الشعور بدرجه التجمد  و السنوركلينج و رؤية احلي واجمل خلق الله و تجارب كتير جديدة و ممتعه

و تخلص السنه بان شغلي بدأ يرجع لرونقه مره تانيه و ابتديت اتحسن فيه و احبه بعد ما كنت كرهته فعلا بسبب كل اللي حصل فيه و بردوا لسه بقول الحمد لله .

سنه 2016 هي السنه الغريبه في حياتي بجد .. اغرب سنه فعلا عشتها يعني حصل احلي و اوحش احداث في حياتي مش هقدراقول انها سنه حلوة و لا اقدر اقول سنه وحشه بس اللي هقولة ربنا يطلعنا منها علي خير و كل سنه وانا لله اقرب واقرب و الحمد لله علي كل حال <3 a="" p="">

الثلاثاء، 11 أكتوبر 2016

اليوم العالمي للفتاة

جريمتي الكبرى .. أنني امرأة حرّة في زمن لا يريدون فيه إلا الجواري والعبيد، ولدت بعقل يفكر في زمن يحاولون فيه إلغاء العقل فإن قلة عدد النساء والفتيات المهتمات بعقولهن، هي ظاهرة موجودة في المجتمع العربي وهي ظاهرة لا تدل على أن المرأة ناقصة عقل ولكنها تدل على أن التربية التي تلقتها البنت منذ الطفولة، تخلق منها إمراة تافهة التفكي فقد يصبح الرجل المتمرد أو الثائر بطلاً شعبياً يحترمه الناس، لكن المرأة الثائرة المتمردة تبدو للناس شاذة غير طبيعية أو ناقصة الأنوثة  , حطمي قفل الدرج وأكتبي في النور، إغضبي وثوري ولا تستكيني فان الشخصية الناضجة هي وحدها التي تستطيع أن ترغب الحرية وتسعى إليها دون أن تخشاها ، فالحرية تخيف الإنسان غير الناضج غير المستقل.
واعلمي جيدا ان الإنسان يفقد كرامته حين يعجز عن الإنفاق على نفسه  وان الرجال لا تحب إلا تلك التي تؤلمهم.
#مقتبسات من مقالات #نوال_السعداوي
#اليوم_العالمي_للفتاة

#International_Day_of_the_girls

الأحد، 2 أكتوبر 2016

ask.fm

كان في سايت اسمه ask.fm انا كان عندي اكونت عليه و كنت بدخل عليه ع طول بس بقالي اكتر من سنتين مدخلتش عليه وانهارده معرفش ليه افتكرته وفتحته واتفاجئت بردود ليا انا مش مصدقة اني كنت برد كدا ولا دي انا بجد !!

انا فعلا اتغيرت واتغيرت اووووي كمان عندكوا حق بس اتغيرت للاحسن و بجد انا مبسوطة وراضيه عن نفسي 100% الحمد لله .
والزمن لسه هيعلمني و لسه هتغير .

و صدقوني ميهمنيش رايكوا فيا ولا رضي الناس عني و لا بكره هكون ايه ولا فين ولا كون الناس شيفاني شيخه ولا بمثل ولا اني مش حقيقة ولا اني يومين و هرجع زي الاول ولا كل الهري اللي بسمعوا من قدامي و من ورايا .

بس بجد رضي ربي عليا دي الحاجه الوحيده اللي هفكر فيها دائما وابدا .
#اللهم_لك_الحمد #اللهم_رضاك_والجنه #انا_انشكحت_اوووي  

الجمعة، 30 سبتمبر 2016

10 حقائق من ارض الواقع

1 - الاصحاب مش دايما بيكونوا سند احيانا بيكونوا هما القشه اللي بتقطم ضهرك خاصة انهم بيكونوا عارفين عنك كل حاجه ممكن تكسرك (بلاش الثقه العمياء دي).
2- الجواز مش كله حب و كلام معسول و لا بردوا كله مشاكل و خناق .. هتلاقي من دا ع دا زي اي حياة (فمتستعجلوش).
3- السنجل مش معقد و لا بينفسن ع المرتبطين بالعكس بقي دا دايما اللي متجوزين بيحسدوه ع راحة باله اللي عايشها (استمتعوا بسنجلتكوا و سيبوه في حاله).
4- المثل اللي بيقول سيب البنت تحبك و حب البنت تسيبك دا حقيقي بس في نفس الوقت الولد ميحبش البنت المدلوقه و بيحب البنت اللي بتتقل وتتنك عليه (ودوخيني يا لمونه).
5- البنت بتعجب بالولد الجان اللي البنات هتموت عليه ويعرف ميت واحده بس لما تتجوزه بتبقي عايزها ليها لوحدها و في الاخر تقولك دا خاين (طب ما حضرتك وخداه خاين و بتاع بنات اصلا).
6- الراجل بيحب الست المتحضره في لبسها و افكارها و حياتها وبتحب السفر و الخروج و ليها صحاب كتير بس مش عايزها تكون من اهل بيته ولا بنته و لا مراته و لا اخته و لو حصل و اتجوزها بيقلب حياتها يقفل حياتها عليه و في الاخر يقلك دي نكدية و كئيبة واتغيرت.
7-  في اي علاقة بين اتنين  الطرف اللي  بيسيب بعد فتره بيقول ازاي انا سيبتها او سيبته  و بيحاول يرجع لكن الشخص اللي بيتساب في العلاقة بعد فتره بيفوق و يقول ازاي انا ارتبط في يوم بالشخص دا و استحالة يرجع.
8- مفيش حد مرتاح في شغله و مفيش زمايل في الشغل بيتمنولك الخير كله بينفسن علي كله و مفيش مدير في الشغل هيهمه حاجه من اللي بيشتغلوا معاه اللي مصلحته منهم .
9- العيال اللي بتخلفوهم دول كل ما بيكبروا كل ما مشاكلهم و همهم بيزيد ومش دايما بيكون عندهم ولاء ليك ع تربيتك ليهم.
10- كلنا عايزين نعيش عيشه كفار بس نموت موتة الصحابه.